LEGAZPI CITY – Tipikal na problema kan Albay Power and Energy Corporation (APEC) sa mga Barangay Power Association (BAPA) an halangkaw na pagkakautang kan mga consumidores.
Sinabi ni APEC Corporate Communication Officer Lesley Capus sa Bombo Radyo Legazpi, bako sana ini nai-eksperyensyahan sa banwaan kan Manito, Albay kundi sa iba pang lugar na sakop.
Ini man an nagbubusol tangarig na warang makuang bastanteng revenue.
Kaibanan pa sa pighahadit kan korporasyon susog ki Capus an dai naaabot na P200 hasta P300 million na pangsustenir sa kabilugang operasyon tangarig na dai mauli sa shutdown.
Afuera digdi, nadiskubre kan APEC puon kan nakalihis na bulan na sa labi 200, 000 na aktibong accounts kan mga consumidores igwa nin 30, 979 na nag-iimbwelto sa iligal na koneksyon.
Nagko-contribuer an nasbaing numero na sa system asin revenue losses na nag-aabot sa P57 million sa kada bulan o nasa labi P600 million sa sarong taon.
Dai pa kasabay sa nasabing numero an mga naghahabas nin elektrisidad na warang aktibong account.
Huli digdi, naipapasa sa mga “good paying” asin “diligent consumers” susog ki Capus an system loss na nag-aabot sa hasta 10% mantang an natatada an pigkakarga kan APEC.
Sa presente segun pa ki Capus, nag-aabot sa hasta 19% an mga system loss na napababa na puon sa dating 22% kan Enero 2020.
