LEGAZPI CITY- Gadan sa engkwentro an sarong halangkaw na opisyal kan New People’s Army makalihis an engkwentro sa Barangay Magogon, Camalig, Albay kan Lunes nin banggi.
Segun ki 9th Infantry Division Public Affairs Office chief Maj Frank Roldan sa intrevista kan Bombo Radyo Legazpi, nabisto ini na si alias ‘Josam’ na pigtataram na nasa tulong dekada na sa kilusan.
Napag-araman na haloy na ining pigmamanmanan antes pa man an engkwentro.
Nakumpiskar sa pinangyarihan kan engkwentro sa an sarong 9mm pistol, mga personal na gamit asin dokumento.
Pagbuyagyag pa ni Major Roldan na si alias Josam man an nahahampang sa manlain lain na kasong kriminal asin murder.
Ini man an pigtutukdong responsable sa pambabadil sa duwang rescuers na suldados na nagsasaod sa Barangay Cotmon sa kaparehong banwaan, nagkapirang taon na an nakakalihis.
