LEGAZPI CITY – Nagpatanid an sarong weather specialist na padagos na mamamatean sa provincia kan Catanduanes an halangkaw na heat index sa mga masunod na mga aldaw.
Ini an makalihis mairehistro kasuhapon, Marso 31 sa presenteng taon an 46°C na heat index sa banwaan kan Virac na pigkokonsiderang nasa danger level.
Segun ki Catanduanes weather specialist Jun Pantino sa intrevista kan Bombo Radyo Legazpi na saro sa mga rason sa pagtaas kan heat index an mga nakapalibot na tubig sa isla provincia kumpara sa ibang parte kan rehiyon.
Ini na suboot an pinakahalangkaw na nairehistrong heat index ngonian na taon alagad dae ninda pighahale an posibilidad na mahalangkawan an naunambitang datos urog nang nagpopoon pa sana an tag-init season.
Pigtaram pa kan opisyal na wara sindang nahihiling na raot nin panahon sa enterong durasyon kan Semana Santa kun kaya laoman na masasapar an kapareho o halangkaw na heat index.
Pagirumdom ni Pantino sa mga mapasyar ngonian na Semana Santa na magdara nin panangga sa init kan saldang asin maiinom na tubig nganing maibitaran an pagkakaigwa nin problema sa salud arug na sana kan komon na heat stroke.
