LEGAZPI CITY- Hagad ngunyan kan barangay kapitan kan Pigcale sa syudad kan Legazpi na magdagos-dagos na an gyera kontra droga ni Presidente Rodrigo Duterte.
Para kaya ki Barangay Kapitan Fernando Lopez, nagbalik an ibang drug surrenderers sa saindang lugar puon kan mapundo an mga operasyon kan kapulisan.
Pigkarkulo kaini na maabot sa 20% an nagpadagos sa saindang iligal na bisyo.
Naglalaom si Lopez na liwat na mababawasan an illegal drug activities sa saiyang pinamamayuhan na barangay sa pagbabalik kan PNP sa nasambitan na kampanya kan gobyerno.
Dae man suboot sinda nagpapabaya sa pagpagirumdom sa mga imbwelto sa iligal na droga.
Sa katunayan, sinabi kan opisyal na nagtatabang sinda ngani na makahanap nin trabaho an mga nagsurindir na drug personalities asin magkaigwa nin sports na libangan ngani na dagos nang malingawan an ipigbabawal na bulong.
Nagtutubod an barangay kapitan na dakula an magigibo kan war on drugs sa pagpuho sa pigkokonsidirar kaining pinakamayor na problema kan Pilipinas.
