LEGAZPI CITY – Nagsapar nin slight injury an sarong lady guard asin department head sa Albay Power and Energy Corporation (APEC) makalihis na saksakon nin ballpen asin kagaton kan nagrereklamong consumidor.
Istorya ni APEC Corporate Communications head Lesley Capus sa Bombo Radyo Legazpi, nagpasiring sa oficina si Marcia Acuña, 58-anyos ngani mag-follow up sa request kaining voluntary disconnection kan biglang mag-iskandalo.
Napag-araman na Disyembre 2020 pa nagsumite nin request si Acuña na naiproseso sa kaparehong bulan asin Enero 29, 2021 na-disconnect.
Sinabi man na may babayadan pang P32.29 sa arrears sa konsumo kan Mayo hasta Oktubre 2020 alagad nadagit an consumidor asin hinagad na makaolay an general manager.
Dai man ini tinugutan huli ta kaipuhan muna nin appointment kaya nakaresibe nin badol nin papel an gwardiya.
Nagtuktok man ini nin makusog sa glass window mantang may meeting kaya nagluwas si Capus ngani aramon an nangyayari alagad magin siya an binadulan man kan papel na kapot kan babayi.
Nakaiwas man an mga ini alagad dai pa natapos an pagwawala kan babayi na nagkuwa nin ballpen na pinansaksak sa duwa asin nagtama sa mga braso.
Liwat pinakalma asin pinatukaw pa an nagrereklamong consumer alagad warang girong-girong na kinagat kan babayi an muro ni Capus na rason ngani mag-apod na nin pulis.
Napag-araman na retired government employee an nagrereklamong consumer asin segun sa mga dating katrabaho, nag-aagi suboot sa psychosocial difficulty.
Mientras tanto, piglalaomang mapaluwas nin pinal na desisyon ang senior management asin legal counsel kan korporasyon kun idadagos an kaso kontra sa bayolenteng consumidor.
