LEGAZPI CITY- Piglalaoman na liwat nang masalang sa anti-illegal drug operations an Guinobatan Municipal Police sa masunod na semana.
Ini makalihis an mga ipigsagibo kaining surveilance asin monitoring sa mga drug personalities.
Sigon sa imbestigador kan nasambitan na pulisya na si SPO1 Michael Culaway, nakakaresibe sinda nin mga impormasyon gikan sa mga concerned citizens asin barangay officials dapit sa mga drug surrenderers na nagbalik sa paggamit asin pagpapabakal nin iligal na droga makalihis na mapundo nin sarong bulan an war on drugs kan PNP.
Naiimbwelto man suboot an mga ini sa mga insidente nin harabonan sa banwaan.
Sinabi ni SPO1 Culaway na nagbilog sinda nin Municipal Drug Enforcement Unit na iyo sana an lehitimong mapartisipar sa saindang mga operasyon kontra droga.
Kumpwesto suboot ini kan mga pulis na malinig an rekord base na man sa kasuguan gikan sa National Headquarters.
Dugang pa kan opisyal, ini an lakdang kan PNP ngani na maibitaran an mga pagdududa na igwa nin extrajudicial killings.
Kasabay man suboot kaini an saindang planong pakikipagdayalogo sa kura-paroko kan Guinobatan asin iba pang opisina kan gobyerno.
Sa ngunyan, positibong ipighayag ni Culaway na may mga target na sinda para sa Double Barrel Reloaded kun kaya laoman na liwat nang magkakaigwa nin paz y orden sa banwaan.
