LEGAZPI CITY—Ipighayag kan grupong Bantay Bigas na an paghali kan branding sa mga imported na bagas sarong “anti-consumer” huli ta pighahalian kaining karapatan an mga konsomedores na magpili sa mga klase nin bagas na saindang babakalon, ini makalihis an pahayag kan Department of Agriculture na halion an brand labels sa mga imported na bagas.
Segun ki Cathy Estavillo, an tagapagtaram kan grupong Bantay Bigas, sa intrevista kan Bombo Radyo Legazpi, an paghali kan mga brand sa mga imported na bagas dae maresulta sa paghibaba kan presyo nin mga bagas, asin pwedesir pa ining magkawsa nin pagkalibong sa mga konsomedores huli ta dae na ninda mamimidbidan an mga dating brand kan bagas na saindang pigbabakal.
Dugang kaini na bako solusyon an paghali kan branding sa mga imported na bagas para mapundo an manipulasyon, hoarding, asin smuggling.
An nasambit na lakdang pwedesir pa suboot na gamiton kan mga traders asin importers para ihalangkaw an presyo kan mga bagas, siring man an posibleng paglangkaw kan presyo kan mga locally-produced na bagas kun saen pwede suboot ining ibugtak bilang premium huli ta dae na mamimidbid an pigbabakal na bagas.
Sinabi man kaini na an kawsa kun nata padagos na naghahalangkaw an presyo kan bagas iyo an implementasyon kan Republic Act 11203 o an Rice Tarrification Law.
Mientrastanto, nangapudan ini na dapat magkasararo sa pagbusol sa gobyerno na gibuhong prayoridad an industriya nin agrikultura sa nasyon siring na sana an pagpapakusog sa mga lokal na produksyon.
