LEGAZPI CITY – Nakukulangan an saro mang grupo nin mga paratukdo sa mga sinabi ni Presidente Ferdinand Marcos Jr. sa saiyang ika-apat na State of the Nation Address.
Segun ki Alliance of Concerned Teachers Chairperson Vladimir Quetua sa intrevista kan Bombo Radyo Legazpi na pigtatawan ninda ki gradong incomplete an SONA kan Presidente huli ta may kaipuhan pang ayuson sa saiyang mga pahayag mapadapit sa education sector arug na sana kan pagigin underwork asin underpaid kan mga paratukdo.
Diskompyado man ini na mapapa-otob na maray an paggawad nin overtime pay sa mga paratukdo na nagtatrabaho nin labi anom na oras huli ta dae pa syerto ngonian kun sain makuwa nin pondo.
Pighahalat kan saindang grupo an pagdudugang sa sahod kan mga paratukdo na P50,000 asin bako 50 pesos huli ta kadaklan sa sainda an pig-abonohan an mga kakulangan sa mga eskwelahan.
Pigtaram pa kaini na nakisumaro sinda sa pagkalampag sa Senado nganing enganyaron ini na ipagpadagos an impeachment case ni Vice Presidente Sara Duterte huli ta dapat mapanimbag ini sa ginibong katiwalian kan kalihim pa ini kan Department of Education.
Makamundo suboot huli ta kan pigbubulsa kan bise an pondo kan ahensya an kadakol na mga paratukdo an warang laptops, warang learning materials asin hibaba an sahod kun kaya dae sinda mapundo sa pagbukod na mapanimbag ini.
Afuera kan paniningil sa bise an mawot man nindang singilon si Presidente Ferdinand Marcos Jr. huli ta labing hibaba an pondo kan saindang sektor alagad nakakabakal pa ini nin 12 fighter jets na maabot sa 700 Million Dollars.
Siring man an dae an presidente makapatugdok nin mga eskwelahan mantang mawot kaining gibuhon an Zambales bilang pagibuhan nin bala kan Estados Unidos na nagkokontrahan sa saiyang mga pigbubutasang taramon.
