Grupo nin mga paratukdo, suportado an lakdang kan Deped manungod sa mga “ghost” students

LEGAZPI CITY – Ikinaugma kan grupo nin mga paratukdo an ginibo kan Department of Education na pagsusunad nin complaint laban sa pitong private school huli sa suboot sa pag-enroll kaini nin mga “ghost” students para magin benipesyaryo kan Senior High School Voucher Program.

Segun ki Teachers Dignity Coalition Chairman Benjo Basas sa intrevista kan Bombo Radyo Legazpi na magayon na amay pa sana an school year an na-identipikar na tulos kan kagawaran kun siisay an mga eskwelahan na imbwelto asin magibo nin legal na aksyon.

Suhestyon niya man na isabay man sa complaint an mga ka-kuntyaba kan mga eskwelahan huli ta dae man ini magigibo kan manhamiento sana kun wara an tabang kan mga nasa field na nag-aaram kun totoo an mga identidad kan mga estudyante na benipisyaryo kan programa.

Punto niya man na pigsasagot kan gobierno an gastos sa tuition kan ibang estudyante sa private schools urog na kun labing congested na an mga pampublikong eskwelahan alagad piggagamit man kan iba an nasabing programa nganing maibulsa an pondo na para kuta sa mga tunay asin nangangaipuhan na estudyante.

Pigtaram pa kan opisyal na dapat maghigpit an DepEd sa saindang monitoring huli ta nagigibo pa an siring kaining modus sa ibong kan advance na an teknolohiya sa Pilipinas asin may sadiring Learner Reference Number sain man sindang eskwelahan mag-enroll.

Dapat suboot na maghiro an gabos huli ta an kwartang pig-aalokar sa mga programa kan gobierno an pigkukuwa hale sa satuyang mga buwis.

Mientrastanto, maugma man na pig-anunsyar ni Basas an pagpopoon ngonian na aldaw kan selebrasyon kan World Teachers Month asin may mga nakalatag na mga aktibidad asin nagmamawot na makisumaro an mga paratukdo sa enterong parte kan nacion.