LEGAZPI CITY – Pigbabasol kan grupong Alliance of Concerned Teachers sa pagtitipid nin pondo kan gobierno an mga nagdadakol na numero kan mga eskwelahan sa nacion na warang mga principal.
Segun ki Alliance of Concerned Teachers Chairperson Vladimer Quetua sa intrevista kan Bombo Radyo Legazpi na hilingon na suboot na pigtitipid kan gobierno an sektor kan edukasyon nin huli sa kakulangan nin mga principal sa mga eskwelahan.
May mga nagkapira man na principal na duwang eskwelahan an pigkakaputan nganing masabi sanang may nagkakapot o may namamayo sa sarong eskwelahan.
Dakula man an epekto kan mga problemang nagruruluwasan sa lado kan edukasyon kun kaya nagbababa an kalidad kaini partikular na sa mga resulta kan mga test sa mga nagkapirang eksaminasyon.
Pigtaram pa kaini na solamenteng sa Pilipinas sana suboot sa enterong kinaban an nagtetenir na hibaba an pondo para sa sektor kan edukasyon asin makakatabang ining mga problema nganing malinawan an gobierno na gibuhong prayoridad an pagtaas kan pondo kan Department of Education.
Dugang niya man na sa ibong kan kadakol na nagpapasar sa Licensure Examination for Teachers, diiton lang an nakakalaog sa departamento nin huli sa kakulangan kan sistema asin dae paggibo nin sulusyon nganing mapamaray an pagkakanood kan mga estudyante.
Sa presente an makikipag-olay an grupo ninda Quetua sa kagawaran nganing maitukar an mga pigkakahampang na mga isyu kan paratukdo, estudyante asin mga eskwelahan sa bilog na nacion.
