LEGAZPI CITY – Nakukulangan an grupo nin mga paratukdo sa pag-implementar kan Department of Education kan apat na aldaw na workweek para sa mga non-teaching personnel.
Kasunod ini kan direktiba ni Presidente Ferdinand Marcos Jr. na iimplementar an energy conservation measures sa gabos na opisina kan gobyerno huli sa paglangkaw kan presyo kan langis kawsa kan iriwal sa Middle East.
Paliwanag ni Teachers Dignity Coalition Chairperson Benjo Basas sa intrevista kan Bombo Radyo Legazpi na kadaklan kaya sa mga pampublikong eskwelahan an dae nag-aabot sa sampulo an non-teaching personnel na dae man makakatabang sa mawot kan gobierno na pagtitipid.
Afuera sa mga non-teaching personnel, ipigsuhestyon niya man na dapat bawasan man an class days kan mga estudyante alagad pwedesir na dae na man ini kaipuhanon ngonian huli ta nagkataon na kadaklan sa mga eskwelahan ngonian an nasa pagtatapos na kan presenteng school year.
Kun hahaputon suboot siya bilang sarong paratukdo, mas makaka-bwelo sinda kun nagta-trabaho sindang dae pig-iisip an mga tutukduan na estudyante maski ipa-otob man sainda an work from home setup o onsite na pagtrabaho.
Punto man kan opisyal na dae makakatipid sa kuryente an sarong eskwelahan hangga’t nagpapadagos pa an mga klase kan estudyante huli ta kadaklan sa mga classroom ngonian an warang aircon asin bako maray na bentilasyon na nagigin rason kan paggamit kan mga electric fan.
Segun pa ki Basas na padagos man an saindang pakikipag-koordinar sa kagawaran nganing matukar an saindang kahagadan arug kan pagsasagibo nin classroom observation kan mga paratukdo sa irarom kan presenteng school year.
