LEGAZPI CITY – Nahiling kan grupo nin mga paratukdo an mga problema na suminabat sa mga paratukdo, estudyante asin mga magurang sa enot na tulong aldaw kan brigada eskwela sa enterong nacion.
Segun ki Alliance of Concerned Teachers Chairperson Vladimir Quetua sa intrevista kan Bombo Radyo Legazpi na mantinidong nagkaigwa nin kakulangan sa mga eskwelahan arug na sana kan tukawan, electric fan, learning materials asin an kadaklan an maklase sana sa covered court, shifting asin sa hirarom kan mga kahoy.
Dapat suboot gibuhan kan Department of Education nin paagi kun pano masusulusyunan an kakulangan nin classroom urog nang nagdadakol sa presenteng numero numero kan mga estudyante.
Alagad punto niya na dae man ini mabago kun mga paratukdo asin estudyante sana an naggigibo nin temporamenteng sulusyon mantang puro band-aid solution sana an an ipigtatao kan gobierno.
Napansin man kan tagapagtaram na mabantol an pag-hire kan Deped nin mga paratukdo huli ta maagi pa ini sa halabang proseso asin dae man sana suboot matatanggap kun kaya nagkukulang an pwersa kan mga paratukdo sa mga eskwelahan.
Magigin resulta man kan kakulangan sa numero kan paratukdo an kakaipuhan nindang magtukdo nin haros 7 oras asin tatawan nin kadakol na workload na warang overtime pay.
Huli kaini, nakatalaan sindang magkondusir nin bisita eskwela nganing obserbahon an kamugtakan kan mga eskwelahan sa National Capital Region asin katarid na rehiyon.
Kahagdan ni Quetua sa administrasyon na siring kan pag-sakripisyo kan mga magurang sa brigada eskwela, dapat man sindang magsakripisyo sa paagi kan pagtataas kan budget sa sektor kan edukasyon huli ta kadakol pang problema sa mga eskwelahan na dapat aksyunan.
