LEGAZPI CITY—Nagsumiter an Teachers Dignity Coalition nin petisyon mapadapit pagkuwestiyon sa konstitusyonalidad kan 2025 National Budget sa Korte Suprema.
Ini makalihis na nalagpasan kan budget kan Department of Public Works and Highways (DPWH) na may kantidad na P1.05 trillion kumpara sa budget kan pinagsararong ahensya na may kinaaraman sa sektor kan edukasyon na nagkakantidad sana nin P913.3 billion.
Segun ki Teachers Dignity Coalition Chairperson Benjo Basas, sa intrevista kan Bombo Radyo Legazpi, na saro ining pagbalgar sa constitutional provision partikularmente na an Article XIV, Section 5, Paragraph 5 na nagsasabi na an Estado dapat magtagama nin pinakahalangkaw na prayoridad sa budget sa edukasyon.
Sinabi kaini na an ipigtalaang budget para sa edukasyon an dae nagsisimbag sa mga pangangaipuhan kan mga paratukdo.
Nagngangalas man si Basas kun nata may nagkapirang ahensya kan gobierno an ibinugtak sa budget kan edukasyon dawa na dati dae man an mga ini pig-iiriba sa nasabing ahensya.
Mientrastanto, nagmamawot man an saindang grupo na dadangugon sinda kan Korte Suprema ngani na mapakarhay an pagbabanga kan budget.
