LEGAZPI CITY – Nanindugan an grupo nin mga paraooma na dae dapat iselebrar kan gobierno an pagbaba kan importasyon nin bagas kan Pilipinas.
Magigirumduman kaya na pighayag kan Department of Agriculture na nagbaba an importasyon nin bagas kan nacion sa enot na tulong bulan kan 2025 kompara sa parehong panahon kan 2024.
Segun ki Bantay Bigas spokesperson Cathy Estavillo sa intrevista kan Bombo Radyo Legazpi na maski nagbaba an rice importation kompara kan nakaaging taon, dae man dapat giraray ipagselebrar kan gobierno an nasambitang akomplisyemento.
Dakula suboot an nagin epekto kan paglangkaw kan rice imports kan nakaaging taon huli sa tindi kan el niño mantang nagpapadagos man giraray ngonian an antas kan pag-import maski warang namamateang kalamidad an pilipinas.
Pigtaram pa kaini na padagos pa man na nalulugi an mga paraooma maski dae pa nagpopoon an harvest season kun kaya wara dapat na ipagselebrar an gobierno huli ta nagtetenir na hibaba an presyo kan paroy.
Mawot niya man na maggibo na nin lakdang an National Food Authority sa paagi kan pagbakal kan mga inaning paroy kan mga paraooma huli ta dae namamatean kan publiko an buffer stock kan ahensya.
Wara man suboot sindang nahihiling na 33 pesos na kantidad kan bagas sa mga merkado na naenot na pigtaram kan DA na dadarahan ninda.
Pagdoon pa ni Estavillo na kadakol nang ginibong alternatibo an departamento nganing mapababa sana an presyo kan bagas alagad hasta sa ngunyan an wara sindang nahihiling na magayon na epekto kaini.
