LEGAZPI CITY – Nagsunad nin petition an grupo nin mga paraooma sa ofisina kan Department of Agriculture katakod sa pag-bugtak nin probisyon sa pag-import nin bagas.
Segun ki Federation of Free Farmers Chairman Leonardo Montemayor sa intrevista kan Bombo Radyo Legazpi na an naunambitang petition an kasimbagan sa agrangay kan mga paraooma mapadapit sa hababang presyo kan paroy na nag-aabot na sana sa otso sagkod 10 pesos kada kilo sa nagkapirang lugar na harayo sa P14.50 na production cost na maresulta sa pagkalugi ninda.
Huli suboot ta hababa an presyo ngonian kan paroy an dae nababawi kan mga paraooma an saindang ginastos sa abono, binhi asin iba pang gastuson mantang nahiling man ninda na bako epektibo an temporary ban kan presenteng administrasyon sa pag-import nin bagas.
Pigdoon niya man an Republic Act 8800 o an Safeguard Measures Act na ipinasa kan taong 2000 kun sain an DA Secretary pwedeng mag-bugtak nin mga safeguard duty o buwis sa ibabaw kan mga regular na taripa, kun igwa nin paglangkaw sa mga importasyon nin bagas na nagkawsa, o huma na magkawsa nin malalang danyos sa mga lokal na paraoma mantang wara man nin limit an taripa an pwedesir ipataw kan kalihim na madurar nin sagkod 200 aldaw o 7 bulan.
Pigtaram pa kan opisyal na sa oras na ipina-otob na an naunambitang lakdang an pag-aadalan kan Tariff Commission an magigin pinal na desisyon manungod sa nasambitang problema.
Enkaso magpadagos an paglakop kan mga mas barato na imported na bagas an may posibilidad na pagbagsak kan presyo kan lokal na paroy kun kaya dapat suboot na ipa-otob na ni Agriculture Secretary Francisco Tiu Laurel Jr. an naunambitang lakdang nganing magtao nin remedyo sa matinding problema kan mga lokal na paraooma mapadapit sa rice importation.
Pighistorya niya pa na afuera sa talamak na rice imports sa Pilipinas an nagtatao man nin dugang na pahirap sa mga paraooma an magkakasunod na bagyong tuminama asin an mga anomalya sa mga flood control projects na makakatabang kuta nganing dae malubog sa baha an saindang mga omahan.
Piglalaoman ni Montemayor na dadangugon ni Agriculture Secretary Tiu-Laurel asin kan Marcos Administration an paghagad kan mga paraooma nin tabang na nakabugtak sa ley nganing masimbagan an problema kan labing hababa kan presyo kan paroy.
