LEGAZPI CITY – Sinabat kan grupo nin mga paraoma an bulan nin Hulyo nin sarong protesta kontra sa padagos na pagmahal kan presyo nin mga barakalon partikular na an bagas.
Nagtipun-tipon an mga nagkapirang grupo sa Mendiola ngani na ipaabot an mga pangapudan sa gobyerno.
Sa intrevista kan Bombo Radyo Legazpi kay Cathy Estavillo an tagapagtaram kan grupong Bantay Bigas, kaiba sa saindang pigkokontra an plano kan administrasyon ni Presidente Ferdinand “Bongbong” Marcos na pababaon an taripa sa imported na bagas sa 15% hali sa presenteng 30%.
Segun kay Estavillo, wara nin kasiguradon na makakatabang an lakdang ngani na mapugolan an padagos na pagmahal kan presyo nin bagas sa mga merkado sa Pilipinas.
Alagad sierto suboot na maapektaran kaini an kabuhayan kan mga lokal na paraoma huli ta imbes na sainda magbakal an mga traders, mas pipilion na sanang mag-import sa ibang nasyun.
Pigkukwestiyon man kan Bantay Bigas kung hain na an ipigpromesa kan Presidente na P20 na presyo kan kada kilo nin bagas durante kan kampanya.
Pangapudan kan grupo na imbes na mag-import, tabangan na sana an mga paraoma ngani na makapag-ani nin mas dakol na bagas asin masimbagan an halangkaw na demand sa Pilipinas.
