LEGAZPI CITY- Tinawan duon kan grupo kan mga obrero na haloy na panahon nang problema kan mga obrero an halangkaw na presyo kan mga babarakalon huli sa labing baba kan sweldo kan mga namamanwaan.
Marurumduman kaya na pigkakahaditan an pagsipa kan presyo kan babarakalon huli sa magkakasunod na paglangkaw kan presyo kan produktong petrolyo.
Segun ki Bukluran ng Manggagawang Pilipino Chairman Leody De Guzman sa intrevista kan Bombo Radyo Legazpi na kun naitatao an halangkaw na pasahod sa mga obrero, dae kuta madidifisilan an mga namamanwaan.
Ikinumparar kaini an sitwasyon sa ibang nacion na maski pa halangkaw an presyo kan babarakalon, dae man nadidifisilan an mga residente huli ta halangkaw an sahod kaya may kakayanan na punuan an saindang mga pangangaipo.
Ipinunto man kan opisyal na saro sa mga rason kan halangkaw na presyo kan produkto iyo an scarcity o kakulangan nin supply kaya padagos na nag-aangkat an nacion nin manlain lain na klase nin produkto.
Dugang pa ni De Guzman na garing wara na nin paglaom sa presenteng administrasyon na pakusugon an lokal na industriya huli sa kawaran nin aksyon kan mga nasa pwesto.
