LEGAZPI CITY- Tinawan duon kan sarong grupo nin mga obrero na kinakaipuhan na masierto na magkakaigwa nin sarong mapagkakatiwalaan na Senado.
Ini an sa tahaw kan padagos na sigalot sa liderato kan halangkaw na kapulungan.
Segun ki Partido Manggagawa Secretary General Judy Ann Miranda sa intrevista kan Bombo Radyo Legazpi na huli sa nangyayaring kariribukan, dae na natatawan nin atensyon an nagkapirang orolay na makakatabang sa mga obrero sa nacion.
Kaibanan digdi an haloy nang nakabinbin na P200 wage increase para sa mga manggagawa sa nacion.
Sinabi kan opisyal na makadisganar an nangyayaring bangayan sa Senado urog na sa presenteng panahon na padagos an paglangkaw kan presyo kan mga babarakalon, kaya napapanahon kuta na tutukan an pangangaipo kan mga obrero.
