LEGAZPI CITY—Ipig-agyat ngunyan kan grupo nin mga nurse an bagong Department of Health secretary na si Dr. Jose Brittanio Pujalte Jr. na masimbagan an orolay sa nagpapapados na problema sa salud asin kamugtakan kan health workers sa nacion.
Ini an kasunod kan pagbutas ni dating DOH secretary Teodoro Herbosa bilang kalihim kan nasabing ahensya.
Segun ki Filipino Nurses United President Jocelyn Andamo, sa intrevista kan Bombo Radyo Legazpi, sainda ining pig-agyat huli sa dae man suboot natawan prayoridad kan gobierno an public health care.
Para sainda na maski pig-aagi sa mga taramon asin band-aid solutions an dae man nasosolusyonan kan ahensya an mga problemang pigkakahampang sa salud.
Ipigdoon man niya na kun may bastanteng pondo para sa public health an dakol na kaining mareresolbaran partikularmente an orolay mapadapit sa problema sa bulong asin pagpabulong.
Dugang ni Andamo, na kabale sa duwang pinakadakulang agyat para sa DOH secretary— enot an magkaigwa nin relevant response, substantial na mga lakdang nganing masolusyon an haloy nang problema sa pangsalud; asin ikaduwa an pag-address sa isyu nin korapsyon sa salud.
Katakod kaini, plano man kan grupo na makipag-olay ki DOH Sec. Pujalte Jr. nganing ipaaram asin itukar saiya an presenteng isyung pigkakahampang kan healthcare system asin nurses sa Pilipnas.
