LEGAZPI CITY – Nakisumaro an grupo nin mga kababaihan sa rehiyon Bicol sa isinagibong anti corruption rally sa ciudad kan Legazpi nganing kondenahon an mahiwasang korapsyon sa gobierno asin pagkomemorar kan martial law.
Segun ki Bicolana Gabriela Regional Coordinator Nica Ombao sa intrevista kan Bombo Radyo Legazpi na nagkondusir muna sinda nin misa pasasalamat nganing rumdumon an mga biktima asin nag-alay nin buhay kan panahon nin martial law.
Dakulang kasalan suboot sa taumbayan an paghahabon kan pulitiko bako sana sa orolay kan flood control project kundi pati man sa ibang sector arug kan sa edukasyon mantang sagkod ngonian an warang ipigbubugtak na pondo para sa sektor kan kababaihan.
Dae man sinda nagtutubod na nagtitios na nacion huli ta kadakol an yamang-kalikasan kundi nagtitios an Pilipinas huli sa mga kurakot kun kaya dapat na mapanimbag an mga tiwaling pulitiko.
Pigtaram pa kan opisyal na importante an mga siring kaining protesta nganing ipagirumdom sa mga opisyal kan pulitiko na taumbayan an nag-elihir sainda sa pwesto asin taumbayan an may kakayanang magpahali sainda.
Dapat mahiling suboot kan mga namamanwaan na naggigibo nin paghiro nganing mangyari an pangapodan na pagbabago.
Pagirumdom ni Ombao na magmuklat na asin manindugan na huli ta padiit-diit nang nalalamos an nacion sa korapsyon asin oras nang maghagad nin paninimbagan mantang kun talagang abo kan gobierno na mahantong an Pilipinas sa Nepal an dangugon na ninda an kurahaw kan namamanwaan.
