LEGAZPI CITY – Dae ikinaogma kan Albay Public Safety and Emergency Management Office (APSEMO) makalihis na malusutan kan grupo kan mga mountaineers sa pagsakat sa Bulkang Mayon.
Napag-araman na kaining Oktubre sana kan magsakat an grupo sa pangengenot kan nabistong si Harold Borja sa pag-agi sa Bonga Trail sa banwaan kan Bacacay pasiring sa Mayon Volcano Natural Park asin pigsasabing nag-‘crater climb’ pa.
Sa ekslusibong intrevista kan Bombo Radyo Legazpi ki APSEMO chief Dr. Cedric Daep, nangangaipo na nin kabilugang policy review sa provincial ordinance na nagre-regulate sa pagbabawal sa crater climb.
Insulto suboot sa mga ahensyang nagbabantay sa Mayon an ginibo kan grupo kun sain ipinahiling pa ni Borja sa social media post na nakakua pa ini kan permit hali sa Provincial Environment and Natural Resources Office (PENRO).
Bako man suboot ini an enot na bes na nakalusot an grupo sa backdoor mountaineering climb sa Mayon kaya mawot man ni Daep na i-ban si Borja sa aktibidad sa provincia.
Mayor na obheto kan ordinansa an maprotehiran an buhay kan mga turista huli ta lokal na gobierno man giraray an maresponde en caso makaag sa peligro an mga ini.
Klarado suboot an peligro sa Mayon na presenteng nasa Alert Level 2 status o moderate level of unrest alagad nagkaigwa sana nin problema sa guidelines an provincial tourism asin disaster management offices sa standard policy kan DENR.
Ire-reconcile na man suboot an guidelines sa pagsakat sa bulkan sa isasagibong meeting kan mga concerned agencies ngonian na aldaw.
