LEGAZPI CITY — (UPDATE) Dae naman makakaatendir pa sa graduation kaini sa masunod na bulan an sarong grade 6 student makalihis na ma-trap sa laog kan nasusulong harong sa Barangay Oras, ciudad kan Tabaco.
Segun ki Fire S/Insp. Gary Francisco, city fire marshall kan Bureau of Fire Protection (BFP) Tabaco, napuho na an kalayo kan makaabot sinda sa pinangyarihan kan kasulo kun sain nadiskubre an hawak ni Abegail Corporal.
Istorya suboot kan ama na brown out sa barangay kan mangyari an insidente kun sain nagsindi sana ini nin kandila asin ikinaag sa kusina antes na magpasiring sa sentro kan Tabaco.
Nawalat suboot sa harong an babaye asin tugang pang lalaki. Alagad naghali an lalaki ngani na maghiling ki basketball mantang nagkaturog na suboot si Abegail.
Segun ki Francisco, posibleng napupos na an kandila asin huli sa gibo sa light materials an harong, madaling naglakop an kalayo.
Nag-bucket brigade man suboot an mga residente ngani na mapundo an kalayo alagad dae aram na yaon sa laog an aki.
Dugang pa kan opsiyal, nahangos na suboot kan aki an aso na nagcausa kan suffocation kun kaya dae na nagibo pang makaluwas kan biktima.
