LEGAZPI CITY—Matrayumpong nai-rescue kan mga kapulisan an sarong Grade 11 senior high student na menor de edad makalihis na makuwaan ini nin iligal na droga sa Tabaco City.
Segun ki Tabaco City Police Station Chief of Police, Police Lieutenant Colonel Virgil Bibat, sa intrevista kan Bombo Radyo Legazpi, nasita suboot ini kan saiyang paratukdo sa sarong parte nin CR kan eskwelahan mantang naninigarilyo alagad kan tinapok kaini an sigarilyo an may nahiling pa digdi na marijuana.
Sa presente nakipagkoordinar na an kapulisan sa City Social Welfare and Development nganing masierto an kaligtasan kan nasabing persona, tamang pagkapot nin kaso, asin an saiyang access sa magkakanigong interbensyon asin mga serbisyong rehabilitasyon.
Pagdoon ni Bibat na mas mahigot an saindang koordinasyon asin visitation sa mga eskwelahan nganing maibitaran an mga siring na ilegal na aktibidad.
Mientrastanto, nagpatanid man an opisyal sa publiko urog na an mga nag-aatendir nin Misa de Gallo na siertohong i-secure an saindang kaharongan bago maghale sa harong, asin magin mapagmatyag kontra sa mga modus—sa personal man o online.
