LEGAZPI CITY – Puga-puga na suboot an paghahanda kan Museo de Legazpi sa Albay katakod kan kaabang-abang na exhibit sa Nobyembre na tampok an mga isinulot na gown sa prestihiyosong pageant ni Miss Universe Catriona Magnayon Gray.
Sa intrevista kan Bombo Radyo Legazpi ki Darlito Perez, museum curator kan Legazpi, nanalaytay an dugong Bicolano ki Catriona na dapat sanang ibida sa mga kahimanwa.
Aprubado asin ‘ready to showcase’ na suboot an nagkapirang isinulot ni Catriona na kapot ngonian kan National Historical Commission of the Philippines.
Pighahalat pa sa ngonian an commitment kan designer kan “lava gown” ni Catriona na pwedeng ipahiling sana suboot sa laog nin tulo hasta sa limang aldaw.
Dodoblehon man an ilalatag na seguridad para sa pagbabantay sa nasabing espesyal asin mamahalon na gown.
Afuera ki Catriona, kaibanan man sa mga ipapahiling sa exhibit an mga kapwa Bicolano title holders kaini sa manlain-lain na darakulang pageants na binalehan.
Mientras tanto sa Pebrero sa masunod na taon man, dagos na dagos na an solo artist exhibit kan mga painting ni Heart Evangelista sa museo sa oil canvass medium.
Ipigbuyagyag man ni Perez an pakikipag-coordinar sa pamilya kan sarong dating Presidente kan Republika tangarig mai-feature an mga paintings kaini na target sa maabot na Disyembre.
