LEGAZPI CITY — Piglinaw ni APSEMO chief Dr. Cedric Daep na plano pa sana an buy out scheme asin dakol na proseso pa ining kinakaipuhan na pag-agihan.
Pag-eksplikar kan opisyal, kinakaipuhan na magkaigwa nin hirarom na pag-aadal ngani na magkaigwa nin tamang plano para sa ikakarahay kan mga residentes.
Huli digdi, nag-organisar na suboot si Albay Governor Al Francis Bichara nin technical working committee ngani na magtabang sa paglatag nin plano oras na maaprubaran na an nasambitan na scheme.
Segun ki Daep, dakula an maitatabang kan nasambitan na scheme na pagbakal sa daga kan mga paraoma sa 6km permanent danger zone huli ta mas dakol an magagastos kan gobyerno kada nagkakaigwa nin pagputok an Bulkang Mayon huli ta nagdadakula man an populasyon.
Nagtutubod man an opisyal na kun ire-relocate an mga residente kinakaipuhan man na magkaigwa nin pangkabuhayan.
Pigduon man kaini na dapat na matutukan bako sana an sektor kan agrikultura kundi magin an employment opportunity, industrial opportunity, marketing opportunity, asin home industry opportunity.
