LEGAZPI CITY – Nanindugan an mga health workers hali sa Government-Owned and Controlled Corporation (GOCC) hospitals na dagos-dagos an pagkondukta nin hiro-protesta hasta dae naitatao an saindang One COVID-19 Allowance (OCA).
Sa intrevista kan Bombo Radyo Legazpi ki Alliance of Health Workers (AHW) President Robert Mendoza, liwat na tinuyaw kaini an mga opisyal kan Department of Health (DOH) huli sa pagigin iresponsable asin dae mapagkakatiwalaan sa pag-otob kan serbisyo ngani nasimbagan an mga pangangaipo kan mga health worker sa panahon kan public health emergency.
Idinugang pa an pagigin mabantol kan ahensya sa pag-release kan nasabing allowance sa mga health worker sa ibong kan pagkakaigwa nin malinaw na kaukulang budget allocation na P7.92 billion na itinao sa irarom kan Special Provisions (SP) No. 14 kan DOH budget para sa Fiscal Year (FY) 2022 General Appropriations Batas (GAA).
Kan Pebrero 18, 2022, iniluwas kan Department of Budget and Management (DBM) an nasabing budget allocation para sa probisyon kan OCA sa 526,727 eligible public asin private healthcare workers asin non-HCWs na imbwelto sa COVID-19 response.
Ipigkulog man nin boot na an health workers kan nagkapirang DOH-retained hospitals, naresibe na an saindang One Covid-19 Allowances mantang an mga health worker hali sa Local Government Units (LGU) asin pribadong ospitals dae pa nakakaresibe nin benipisyo.
Inenganyar man ni Mendoza an iba pang health workers na makisumaro sa saindang mga hiro protesta ngani na madangog mismo kan DOH asin administrasyon an saindang mga pangapudan.
Nagpromesa an grupo na ipagpapdagos an mga protesta hasta sa maresibe na an saindang One COVID-19 Allowances asin COVID-19 sickness benefit.
