LEGAZPI CITY – Pig-iimbestigaran na kan Gobierno Provincial kan Sorsogon an suboot direktiba kan Philippine Ports Authority (PPA) na pahalion an mga pasahero na nasa bisinidad kan Matnog Port sa kasagsagan kan pangrarapado ni Super Typhoon Pepito kan nakaaging taon.
Segun ki Sorsogon 1st District Provincial Board Member Ed Atutubo sa intrevista kan Bombo Radyo Legazpi na pig-imbitaran ninda an PPA Managers, PPA Region 5, PPA Matnog Administrator nganing pag-orolayan an nasambitang insidente urog nang holiday season pa ini nangyari.
Paliwanag suboot sainda kan ahensya na pigpahali sana ninda an mga cargo vehicle mantang “judgement call” sana ninda an pagpapahali sa mga pasahero nin huli sa huma kan storm surge sa lugar asin pigpalipat an mga ini sa terminal kan Matnog alagad haros tulong dekada na ining raot.
Pwedesir suboot na palusot sana kan ahensya na pahalion an mga pasahero nin huli ta abo kaining maggastos sa ipapakaon sa mga na stranded na mga pasahero sa nasambitang pantalan.
Pigtaram pa kan opisyal na magigin dakulang tabang an saindang gigibuhon na kasuguan na dae na ipapadiretso an mga biyahero sa mga pantalan sa oras na may papaabot nang kalamidad sa provincia nganing maibitaran na an pagdakol kan bilang kan mga pasaherong stranded.
Dapat na suboot na magsagibo na nin panghaluyang sulusyon nin huli ta dae na man mababago an nangyaring insidente asin dapat na sanang isipon an kapakanan kan mga pasahero nin huli ta pwedesir suboot ining mangyari man sa ibang pantalan sa rehiyon bikol magin sa bilog na nacion.
Sa presente, pig-aaram pa ninda an mga impormasyon asin deklarasyon sa provincia kan mangrapado an naunambitang bagyo kan nakalihis na taon.
Pigtawan doon man ni Atutubo na dae pwedeng puro sana income an saindang nakukuwa nin huli ta pababa nin pababa na an bilang kan mga pasaherong nagsasakay sa mga barko asin punan na an pagkakaigwa nin corporate responsibility nganing maprotehiran an mga biyahero sa anumang sitwasyon.
