LEGAZPI CITY- Pinahimutikan kan gobierno provincial kan Albay na nagkakaigwa nin kakulangan sa suplay nin baybay sa provincia.
Segun ki Albay Provincial Administrator Engineer Rolly Rosal sa intrevista kan Bombo Radyo Legazpi na dakol an stockpile asin handa para sa shipment.
Basado sa datos, igwa nin labi sa 2.2 million cubic meter nin baybay an abilable sa ngunyan.
Paliwanag kan opisyal na maski pa an mga quarry operations na na-terminate huli sa dae pagsunod sa nagkapirang mga polisiya kan nakalihis na taon an tinawan pa nin tsansa na maipaluwas an saindang stockpike kaya warang kakulangan nin suplay.
Napag-araman man na basado sa datos, nagigibo pa kan provincia na makapag deliver nin aggregates paluwas sa Albay asin pasiring sa ibang rehiyon.
Mientras tanto, sinabi man ni Rosal na pigbeberipika ninda an mga agrangay na nagkaigwa nin paglangkaw sa presyo kan baybay huli ta wara man na nakaka abot na report sa saindang opisina.
Nagpatanid man an opisyal na enkasong igwang nagsasamantala sa presyuhan, mapapatawan nin penalidad an mga ini.
