LEGAZPI CITY- Padagos an koordinasyon kan gobierno provincial kan Albay sa Philippine Institute of Volcanology and Seismology para sa posibleng decampment kan mga Mayon evacuees.
Segun ki Albay Governor Noel Rosal na naghahalat sana sinda sa magigin deklarasyon kan nasabing ahensya, ngani na masierto na salbado an mga residente na magbalik sa saindang mga harong.
Paliwanag kan gobernador na naabisuhan siya na posible na kuta ibaba an presenteng alert level 3 kan bulkan, alagad na-octaba ini huli sa liwat na pagkakaigwa nin aktibidad.
Pinaghahalat na sana ngunyan kun magkakaigwa nin pagbaba asin improvement sa mga pigbabantayan na parametro sa Mayon volcano.
Sinierto man kan gobernador na magtatao pa an provincial government nin tig-sarong sakong bagas sa kada pamilya antes mag-uli an mga evacuees sa saindang mga harong.
Mientras tanto, padagos man an pagirumdom ni Governor Rosal sa mga lokal na opisyal na maghanda sa posibleng epekto kan lahar urog na sa mga lugar na nasa pamitisan kan bulkan.
