LEGAZPI CITY—Opisyal nang ipigpalihis kan gobierno provincial kan Albay an selebrasyon kan Magayon Festival 2025.
Segun ki Albay Provincial Administrator Dr. Cedric Daep, sa intrevista kan Bombo Radyo Legazpi, ini ipigpalihis huli sa mga regulasyon kan Commission on Elections (COMELEC) na kun saen ipigbabawal an government disbursement, pagtiripon asin pagtao nin mga onra sa mga partisipante—an mga ini suboot an saindang nahihiling na mga bayolasyon kun kaya nagdesisyon an saindang opisina na ipalihis muna an nasambitang selebrasyon.
Dugang kan opisyal na saro pa sa mga rason kun nata ipigpalihis ini huli ta dae man maiibitaran na may mga mapasiring na politiko—kontra o bako kontra sa administrasyon, sa selebrasyon asin pwedesir ini suboot na gamiton laban sa sainda.
Pigtaram pa kaini na nagkaigwa man nin Plan B kun saen pwedesir ining iselebrar puon Mayo 15 hanggang Mayo 31 alagad posible suboot dakol na mga kandidato an dae na magpartisipar gikan sa mga lokal na gobyerno huli ta kun may mga madaog asin dae ninda makukua an suporta sa LGUs.
Dakol man sindang preparasyon na kinakaipuhan nin disbursement alagad saro ini sa mga nakabugtak sa mga ipigbabawal sa eleksyon.
Nahihiling man nindang opsyon an pagselebrar kaini sa ibang bulan kun mag-integrar kan ibang mga aktibidades kan Magayon Festival sa nagkapirang pagselebrar kan mga festival kan ibang munisipyo.
Dugang ni Dr. Daep na an abelableng pondo kan Magayon Festival na may kantidad na P20-milyones, an porsyon kaini an magagamit para sa promotion kan turismo kan Albay siring kan improvement asin development kan Ligñon Hill para mapagayon bilang tourist destination siring man para sa pag-develop kan diving sa probinsya.
Abiso kan opisyal sa publiko na dae sinda mamondo huli ta preventive measures an saindang piggibo kun saen pig-iibitaran an mga pig-antisiparan na mga problema na pwedesir na kahampangon kun ipinadagos an naunambitang selebrasyon.
