LEGAZPI CITY – Naglalaom si Sorsogon Governor Robert Lee Rodrigueza na dakol na business investments an maabot sa probinsya ngunyan na idineklarar nang drug-free an kapitan kaini na Sorsogon City.
Magigirumduman na idineklarar nang libre sa iligal na droga an gabos na 64 barangay sa syudad base sa anunsyo kan Sorsogon City Anti-Drug Abuse Council.
Inatindiran an seremonya kaini ninda Governor Rodrigueza, City Mayor Sally Lee, Bicol PNP Regional Director Chief Supt. Melvin Buenafe asin iba pang lokal na opisyal na isinagibo sa Bibingkahan Gymnasium.
Sinabi ni Philippine Drug Enforcement Agency (PDEA) Sorsogon Director Vidal Bacolod na base sa nagkapirang patakaran an pagkakadeklarar sa syudad na drug-cleared arig kan kawaran nin big-time drug pushers asin drug laboratories sa lugar.
Inomaw man ni PCSUPT Buenafe an mga tauhan kan PNP siring na man an tabang kan publiko sa pagpuho kan illegal drug menace.
Napag-araman man na nagbaba an index crimes sa Sorsogon City nin 49% sa tahaw kan pinahigot na kampanya kontra droga kan PNP.
