LEGAZPI CITY – Ikinondusir an Gift Giving asin Christmas Party para sa mga Person with Disability (PWD) sa Brgy. 38, Gogon, Legazpi City.
Segun ki Brgy.Gogon Councilor Richilda Atun sa intrevista kan Bombo Radyo Legazpi na ini an inot na pagtiripon kan mga PWD sa saindang Barangay sa pagselebrar kan pasko.
An mga regalong ipigbarewas an hale sa inalokar na pondo kan Barangay bilang suporta asin pagmidbid sa importansya kan mga PWD sa saindang nasasakupan.
Obheto kan saindang inisyatibo na ipahiling an pagkakapantay-pantay kan mga indibidwal asin warang mawawalat, may kapansanan man o wara.
Pigtaram man kan opisyal na uminabot sa kabilugang 107 na mga PWD an nagpartisipar asin nakiugma sa saindang aktibidad.
Permihan nindang pigpapagirumdom sa saindang nasasakupan na ibitaran an pang-bubully sa mga PWD nin huli ta miyembro an mga ini kan lipunan asin kan saindang pamilya.
Pangapodan kaini sa mga may maray na boot na makipagkoordinar asin magdulok sa saindang Barangay nganing matawan nin magkakanigong tabang an saindang mga nasasakupan na PWD.
