LEGAZPI CITY- Inasegurar kan Albay Public Safety and Emergency Management Office (APSEMO) na magkakaigwa pa man nin privacy o pribadong oras an mga mag-agom na nagtetenir ngonian sa evacuation areas katakod kan pag-aalburuto kan bulkang Mayon.
Nadiskutir ni APSEMO chief Dr. Cedric Daep an options sa suboot ‘lovers room’ kun saen kaibanan an pagko-construir nin kubo para sa mga ini, tutugutan o pagbabawalan na makabalik sa harong siring man an free pass sa paggamit kan mga local hotels
Aram man suboot kan mga opisyal an mga importanteng pangangaipo sa siring na aspeto.
Magigirumduman na nag-ugat an legend na ‘Feeding the Pig’ sa naging pag-aalburuto kan Mayon kaitong taong 2014.
Igwa suboot na mag-agom na nagpaaram na magpapakaon sana nin orig kaya mabalik sa harong na nasa danger zone alagad mismong an aki na lalaki kan mga ini an nagbuyagyag na wara sindang ataman na orig.
Tulos man na nag-ako an mag-agom na kaipuhan sana suboot kan mga ini nin diit na oras sa ‘loving-loving’ na dae magigibo sa surusuan na evacuation center.
Sa pagkarisa kan problema, tulos man na nakipagkoordinar an dating gobernador asin ngonian 2nd District of Albay Representative Joey Salceda sa local hotels asin pension houses sa free access sa mag-agom.
Ipigbabariwas sana man an free pass sa esposang babaye tangarig na dae magamit kan mga lalaki an pribilehiyo sa ibang ka-partner.
