LEGAZPI CITY – Tinawan duon kan Anak Bayan na padagos nindang ipaglalaban an free public education ngani na makinabang an gabos na mga jovenes.
Sa intrevista ki Juls de Mesa, presidente kan nasambitan na grupo, sa saindang lado suboot asin sa iba pang progresibong organisasyon, padagos nindang ikukurahaw an ipinaglalaban ngani na makinabang an mga estudyante sa libreng pag-aadal bako sana an mga nasa pampublikong unibersidad.
Segun ki De Mesa, an edukasyon an sarong direchos asin bako sana pribilehiyo, kun sain kun siisay an may kwarta an iyo sana an makakapag-adal.
Ini an katakod kan bareta na magkakaigwa nin paglangkaw sa tuition sa mga pribadong eskwelahan.
Dugang pa kaini na mapagal kuhaon an kwarta urog na sa parte kan mga magurang na pigsasabayan pa kan padagos na paglangkaw kan mga barakalon.
Nadidifisilan suboot an mga magurang na igwang hibabang sweldo kun kaya bako sana an mga estudyante an nagsasakripisyo kundi an bilog na pamilya kan mga ini.
