LEGAZPI CITY – Pigtawan doon kan sarong dating opisyal kan Commission on Population and Development (CPD) na kaipuhan ibusol an pagturo nin “age-appropriate” sex education sa mga jovenes.
Segun ki CPD Former Undersecretary Juan Antonio Perez III sa intrevista kan Bombo radyo Legazpi na importanteng patakaran ini nin huli ta poon pa kan 2018 an nagdadakol na bilang kan teenage pregnancy sa nacion asin nagdakol man suboot ngunyan na 2025 an nabados sa edad na 10 hasta 14 anyos.
Dawa nagdeklara na an gobierno nin national and social emergency, padagos na naghahalangkaw man gilayun an bilang kan mga nababados sa amay na edad.
Kadaklan man suboot sa nakakaimpluwensya sa mga jovenes sa mga siring kaining gawi an paggamit nin gadget asin kawaran o kakulangan nin komunikasyon sa pamilya.
Pigtaram pa kan dating opisyal na dapat suboot na maaraman na kan mga joven mantang na nasa kindergarten pa sana an mga mapadapit sa saindang mga body parts.
Mas importante man suboot an pagkakanood sa eskwelahan nin huli ta an iba sa mga estudyante an nagtatrabaho an mga magurang kun kaya dae sinda natuturuan mapadapit sa saindang sekswalidad.
Pigdugang pa kaini na kalimitan na na-eenot pang magkaigwa nin kaaraman an mga joven sa sekswalidad kaysa sa saindang mga magurang sa presenteng panahon.
Sa iling man ni Perez na dapat isairarom sa training an mga paratukdo nganing maituro ninda nin maray sa mga estudyante alagad nagigin agyat man suboot an pagigin conservative kan mga nagkapirang paratukdo mapadapit sa sex education.
Pigsabi man kaini na dae pagpugulan an siring kaining ley nin huli ta kadakol ining magigibo para sa pamilyang pilipino asin sa saindang mga aki.
Paglinaw pa kaini na kun warang ley na matabang sainda, dae matatawan nin proteksyon an mga adolescent mothers asin mas lalong mahalangkaw an bilang kan mga nababados sa amay na edad.
