LEGAZPI CITY—Ipinautob na an forced evacuation sa mga residentes kan isla kan Rapu-rapu sa Albay huli kan bagyong Pepito.
Sa intrevista kan Bombo Radyo Legazpi kay Rommel Galicia, an bise alkalde kan nasambit na lugar, saindang ipig-force evacuate an mga residentes lalo na an mga nakaistar sa gilid kan dagat.
Sinabi kaini na nasa inisyal na 500 na pamilya na an nag-ebakwar, mantang an ibang residentes naka-ebakwar sa mga pribadong harong.
Sa ngunyan padagos an saindang pagdistribuir nin mga relief goods sa mga residentes.
Naghagad naman suboot sinda nin tabang sa Philippine Coast Guard asin Philippine National Police na kun puwedesir pag-abisohan ninda na dae na pagpaulion an mga residentes sa saindang mga harong.
Patanid man kan bise alkalde sa mga residentes na magsunod sa mga abiso kan State Weather Bureau, asin sa lokal na gobyerno para sa mga masunod pang mga lakdang.
Mientrastanto, susog sa pinakahuring datos kan PAG-ASA alas-onse nin pagkaaga nin Sabado, Nobyembre 16, nakabandera na an Tropical Cyclone Wind Signal Number 3 sa isla kan Rapu-Rapu.
