LEGAZPI CITY – Pigdoon kan mga opisyales kan Barangay Cormidal, Tabaco City, Albay na wara sindang negatibong komento na naresibi hale sa mga residente mapadapit sa flood mitigation structure sa saindang lugar.
Segun ki Punong Barangay Mayan Palumpa sa intrevista kan Bombo Radyo Legazpi na nagpoon an re-construction kan nasabing proyekto kan pagkatapos kan pirilian kan nakaaging Mayo makalihis na marumpag ini kan mangrapado an Bagyong Rolly sa provincia kan taong 2020.
Dakulang tabang suboot sainda na na-rehabilitate an nasabing proyekto huli ta nagtatao na ini nin proteksyon sa mga residenteng naka-istar harani sa salog.
Nagkaigwa man nin koordinasyon sa saindang konseho an contractor asin engineer kan proyekto nganing ipaaram an pagpapakrhay kan dike sa saindang lugar.
Nagtutubod man an opisyal na matibay man an pagkakagibo asin pundasyon kan flood control alagad narisa sana nindang mas hababa ini kompara sa naenot nindang piggibo.
Pighayag man ni Palumpa na an nasabing proyekto an resulta kan saindang paghagad nin tabang sa lokal na gobierno kan Tabaco asin dae niya man nasasabing tinipid an pag-alokar nin pondo huli sa magayon na resulta kan mga flood control sa saindang lugar.
