LEGAZPI CITY – Ikinaugma kan mga opisyales kan Barangay Bariw, Camalig, Albay an ipigtugdok na mga flood control projects sa saindang lugar.
Segun ki Punong Barangay Norbie Namora sa intrevista kan Bombo Radyo Legazpi na sa presente an may tulo nang proyekto an natapos na mantang may tulo pa an pigtatapos kan mga nakadesignar na contractor.
Masasabi niya man na maray an pakakagibo kan mga natapos na proyekto sa ibong kan dae ninda aram kun na-turn over na sainda huli ta wara sindang naresibi o maski taramon mapadapit sa naunambitang flood control.
Basado man sa saindang obserbasyon an nabawasan an mga serye nin pagbabaha sa saindang lugar tuyong nakaka-eksperyensya sinda nin magdamlagang pag-uuran na nakakabawas na sa kahandalan kan saindang mga residentes.
Pigtaram pa kan opisyal na huli ta may pigpapadagos na konstruksyon kan iba pang flood control projects sa saindang lugar an pigkaka-olay ninda an mga contractors kaini na mag-ingat nganing dae man maapektaran an mga kataraid na omahan.
Sa hiling niya man na dapat dugangan an mga flood control sa saindang barangay huli ta labing kaipuhan ini ngonian kan saindang residentes urog nang panahon ngonian nin tag-uran.
Pangapodan man ni Namora sa lokal na gobierno na tapuson na an flood control asin iba pang proyekto mantang dugangan sa iba pa nindang mga purok nganing matapos na an problema kan saindang mga nasasakupan.
