LEGAZPI CITY – Pighayag kan mga opisyales kan Barangay Basag, Ligao City, Albay na napapakainabangan na ninda an ipigkonstruhir na duwang flood control project kan 2024 sa saindang barangay na nagkakantidad na ₱96.5M base sa sumbong sa pangulo website.
Segun ki Kapitan Ariel Olmeda sa intrevista kan Bombo Radyo Legazpi na dakulang tabang sainda an nasabing proyekto huli ta naiibitaran na ngonian an pagbabaha enkaso nakaka-eksperyensya sinda nin mga pag-uuran.
Paghistorya niya man na nagsasagibo pa sinda dati nin evacuation kan dae pa naipapatugdok an flood control project huli sa mala-dagat na pagruso kan baha na hale man sa bulkang mayon alagad dae man sinda liwat nagpapakampante huli ta may posibilidad na magaba an mga ini urog na kun permihan an pag-uuran sa saindang lugar.
Masasabi niya man na maski dae man nabawasan an kantidad kan baha na pigbubulos kan salog an aminado siya na nabawasan an pigpoproblema kan Barangay urog na kun pigrarapado an provincia nin makukusog na bagyo.
Pigtaram pa kan opisyal na kaipuhan pa ninda nin panibagong flood control nganing dae na maglaog sa mga kaharongan an bulos kan saindang salog na nagtataong huma sa mga residentes asin kaakian urog na kun oras nin klase nag-apaw an salog.
Piglinaw niya man na nag-agi sa saindang mga barangay officials an saro sa mga ipigtugdok na flood control project alagad dae niya man masimbag an manungod sa saro pa huli ta saro man sana an naabutan niyang proyekto kan mag-asumir siya sa pwesto sa ibong kan nakapangaran man sana ini sa sarong contractor.
Permihan niya mang ipigpapagirumdom sa saindang nasasakupan na sa ibong kan duwang flood control project an magin rigmat asin tulos na mag-ebakwar enkaso biglang magtaas an tubig na kawsa kan tubig na hale sa bulkang mayon.
