LEGAZPI CITY- Nasa 11 katawo an idinalagan sa ospital makalihis na maimbwelto sa bangaan nin sarong pampasaherong jeep asin sports utility vehicle (SUV) sa parte kan Maharlika Highway sa Brgy. Pang-pang sa ciudad kan Sorsogon.
Bandang alas-6:00 nin aga kan mangyari an insidente na tulos man na nirespondehan kan rescue team kan Sorsogon City Disaster Risk Reduction and Management Office.
Sa intrevista kan Bombo Radyo Legazpi ki Juric Ladisla kan Sorsogon CDRRMO, napag-aramang pasiring sa outing sa banwaan kan Irosin haling Daraga, Albay an magpa-parientes na nakalunad sa jeep kan aksidenteng mabangga kan SUV na pigmamanehar ni Mico John Matabuena, na pauli naman sa Kilometro 13 kan nasabing ciudad.
Sa kusog kan impact sa insidente, irido an sampulong pasahero kan jeep na anas taga-Daraga, Albay kaibanan an sarong 12-anyos na menor de edad asin tulong taga-Davao.
Nagsapar man nin lugad an driver kan SUV sa angog asin hita na napag-araman na nasa irarom kan impluwensya kan arak kan mangyari an insidente.
Labi man an pasasalamat kan mga otoridad na warang nairehistrong malala asin kritikal na tama sa aksidente.
Pinag-aadalan naman kun siisay an maninimbag sa pangyayari.
