LEGAZPI CITY- Nakapagrehistro na nin labi sa P90.8 million na inisyal na danyos sa sektor kan pagsisira sa rehiyong Bicol kasunod kan nakalihis na raot nin panahon.
Segun ki Bureau of Fisheries and Aquatic Resources Bicol spokesperson Rowena Briones sa intrevista kan Bombo Radyo Legazpi nasa 1, 041 na mga parasisira an naapektaran.
Pinag-aantisiparan man na madudugangan pa an nasabing danyos huli ta pighahalat pa an report kan iba pang mga lokal na gobierno.
Napag-araman na kadaklan sa mga naapektaran an nasa aquaculture kun sain nasa 103 metric tons an pagkalugi sa bangus na katumbas nin labi sa P26 million.
Kadaklan sa mga nagsumiter kan report an hali sa fish ponds operators sa nagkapirang mga provincia kan rehiyon.
Ikinamundo man ni Briones an epekto kan nasabing bagyo sa Bicol urog pang nakapagrehistro nin paglangkaw sa produksyon nin sira an rehiyon sa nakalihis na duwang quarters huli sa esfuersos kan ahensya.
Mientras tanto, nasa 202 fishing boats man an nadistroso na katumbas nin nasa P7.4 million na danyos.
Sa presente, pig-aasikaso na an request para sa rehabilitasyon asin recovery program kan nasabing mga fisherfolks.
