LEGAZPI CITY – Warang nahihiling na maraot an Pamilya Batocabe sa suway na imbestigasyon kan ibang ahensya katakod kan pagkagadan ki Ako Bicol Party-list Representative Rodel Batocabe.
Mas marhay pa segun ki Atty. Justin Batocabe, matuang aki kan lehislador kun magkakaigwa nin first investigation, second investigation o parallel investigation tangarig na wara nang interes na maghanap kan suboot “scapegoat”.
Pahapyaw man na nagpatutsada si Atty. Justin sa enot nang nagin pahayag ni incumbent Daraga Mayor Carlwyn Baldo na ginagamit sana suboot ining padantulan o scapegoat sa totoong nasa likod kan krimen.
Si Baldo kaya an itinukdo kan anom na suspek na suboot “mastermind” sa krimen makalihis na mangontrata kan mga hitmen sa kantidad na P5 million.
Segun pa ki Atty. Justin, mas nasa peligro pa suboot an buhay kan pamilya kun bako tunay na suspek an nasa karsel kun kaya dapat na maprobaran nin kongkretong ebidensya an claim.
Sa ibong na afuera sa mga enot nang kinasuhan, igwa pang punong barangay an suboot nakatalaan na kasuhan sa suboot pag-cover up sa nangyari asin pagigin “accessory to the crime” alagad dae naman nagtao pa nin ibang detalyes an mas joven na Batocabe.
