LEGAZPI CITY- Dae nadagos an nakatalaan kutang pagrarasyon nin tubig kan sarong firetruck sa Brgy. District 3 sa banwaan kan San Miguel, Catanduanes makalihis na maimbwelto sa sarong aksidente kasubagong aga.
Enot naman na napag-araman na nakaka-eksperyensya nin kakulangan sa suplay nin tubig an nagkapirang banwaan sa provincia kan Catanduanes huli sa ‘rainfall deficit’ kaya nag-request an nasabing banwaan sa kataid na lugar kan Bato para sa augmentation supply.
Sa intrevista kan Bombo Radyo Legazpi ki SPO1 John Teston, investigator on-case kan San Miguel Municipal Police, pigbabaybay kan firetruck na pigmamanehar ni FO1 Jude Albert Uy an nasabing parte kan tinampo kan mawaran nin kontrol sa manibela huli sa dae pagkagat kan preno.
Katakod kaini, nagdagos-dagos an firetruck asin binangga an harong na pagsadiri ni Edwin Teves na nagresulta sa pagbagsak kan terrace asin window grills kaini mantang nagsapar man nin danyos an hampangan na parte kan behikulo.
Ipinagpapasalamat man ni Teston na warang ibang nakulugan sa pangyayari alagad aminadong nabigla an pamilyang nasa laog kan harong kan mangyari an insidente.
Mientras tanto, nasa kustodiya muna kan San Miguel PNP an nasabing firetruck mantang pighahalat an magigin desisyon kan regional office para sa magkakanigong disposisyon.
