LEGAZPI CITY – Uminabot na sa 50 an kabilugang naitatalang kaso kan firecracker related injuries sa rehiyon Bicol sa pagsabat kan taong 2025.
Segun kay Department of Health Bicol Center for Health Development Regional Program Manager, Violence and Injury Prevention Program Julie Ann Granadino sa intrevista kan Bombo Radyo Legazpi na 26 an naitala sa laog sana kan Disyembre 31 hasta Enero 1 asin 14 kaso man kan Enero 2.
Nangengenot sa saindang datos sa mga provincia asin syudad sa rehiyon na may naitalang kaso an Camarines Sur na igwang 16, sinundan kan Albay na igwang 12, Camarines Norte na may 10, Legazpi City na may 7 asin Naga City na igwang 5 kaso mantang kwitis an numero unong imbwelto sa pagkaka-irido kan mga biktima sa pagselebrar kan bagong taon.
Posible suboot na may mga naputukan sa mga naitala nindang zero firework related injuries alagad bako sa saindang sentinel sites nagpakonsulta kun kaya dae ninda naisabay sa datos.
Alagad, pigtawan doon man ni Granadino na dakulang factor an pagpapaotob nin mga polisiya asin ordinansa manungod sa pagbabawal kan mga ilegal na papaputok sa bilog na rehiyon.
Pwede pa suboot madugangan an bilang kan mga naputukan lalo na kun magpapakonsulta pa sana an mga nabibiktima asin hasta January 6 an pagtatapos kan saindang survailance mapadapit sa firecracker related injuries .
Sa presente, igwa pang 4 na naka confined sa saindang mga sentinel sites sa rehiyon asin base man sa saindang survailance period, mas dakol suboot an kaso kan mga naitatala ngunyan komparar kan pagsabat kan taong 2024.
Pangapodan kaini sa mga naputukan na dae pagbalewalaon an saindang mga lugad asin tulos magpasiring sa mga haraning hospital nganing maibitaran an pagkakaigwa nin infection na pwedeng punan partikular na an tetanus.
