LEGAZPI CITY- Nakapagrehistro nin walong mga fire cracker related injuries an Bicol Regional Hospital and Medical Center puon kan Disyembre 31 hasta sa Enero 1 kasabay kan pagsabat kan bagong taon.
Segun ki Bicol Regional Hospital and Medical Center Medical Officer and Chief Resident Carmela Tambuson sa intrevista kan Bombo Radyo Legazpi na an mga biktima an nasa pagultangan kan edad 10-anyos hasta 67-anyos.
An iba sa mga ini an anas minor injuries sana an sinapar alagad igwa man na kinaipuhan na i-amputate an muro.
Kaibanan sa mga nagkawsa nin injury sa nasabing mga pasyante an kwitis, picolo, wistle bomb asin boga.
Aminado an opisyal na mas halangkaw an datos kan mga fire cracker related injuries ngunyan na dinara sa saindang ospital kumparar kan nakalihis na taon.
Mientras tanto, dae man pighahali ni Tambuson an posibilidad na madugangan pa an nasabing numero huli sa mga insidente na dae tulos nagpasiring sa ospital o posibleng mga naputukan pa huli sa pagpurot nin mga napaso na paputok.
Katakod kaini, pinayuhan kan opisyal an publiko na maglikay asin dae na maggamit nin paputok.
