LEGAZPI CITY – Nauugma an filipino community na makakabalik na an mga kapwa pilipinong naka-istar harani sa boarder kan Thailand asin Cambodia makalihis an ipina-otob an sarong immediate ceasefire .
Segun ki Bombo International News Correspondent in Thailand Toto Cadapan sa intrevista kan Bombo Radyo Legazpi na matuninong na makakapagselebrar an mga pilipinong naka-istar sa boarders kan duwang nacion nin bagong taon huli sa tigil putukan.
Naisakatupadan suboot an ceasefire makalihis na pirmahan an agreement ninda Thai Defense Minister Natthaphon Narkphanit asin an saiyang Cambodian counterpart na si Defense Minister Tea Seiha.
Ipigdoon man kan gobierno kan Thailand na abo ninda kan nangyayaring gyera alagad wara suboot an mga ini na magigibo kundi depensahan an saindang nacion mantang sagkod ngonian an nagpapalitan sana nin basol an duwang nacion kun siisay an enot na nagpaputok.
Pigtaram pa kaini na an Thailand-Cambodia conflict an pinakamalalang gyera na nangyari sa Southeast-Asia na guminadan na nin labi 100 katawo asin nagpa-displace sa labi kabangang milyong indibidwal sa parehong nacion partikulamente na an mga nasa boarder.
Sa pagpapa-otob kan tigil putukan an pwedesir na magbalik an turismo sa duwang nacion huli ta may posibilidad nang mga foreign nationals na magbakasyon sa saindang lugar na magigin lyabi man sa pag-uswag liwat kan saindang mga ekonomiya.
Nagmamawot si Cadapan na magpapadagos na an katuninongan sa duwang imbweltong nacion sa masunod na taon sa ibong kan dae pa aram an magigin durasyon kan paramientras na tigil putukan.
