LEGAZPI CITY – Duminakol an mga nairehistrong aksidente sa Manito, Albay ngonian na bulan nin Mayo kun ikokomparar an datos kan nakaaging bulan.
Segun ki Manito Municipal Police Station Investigator Police Master Sergeant Jonas Cha sa intrevista kan Bombo Radyo Legazpi na numero uno sa mga rason kan mga aksidente ngonian na bulan iyo an pagselebrar kan mga ka-fiestahan sa mga barangay.
Dae man ninda pighahale an posibilidad an huli sa mga pa-kurbadang parte kan mga tinampo sa saindang lugar kun kaya talamak an mga na-aksidente .
Kadaklan man suboot sa mga ini an pigkonsidera nindang minor incident asin naaayos an mga imbweltong lado.
Aminado an opisyal na may mga nagadan na sa mga nairehistro nindang aksidente para sa bulan nin Mayo.
Duminakol man an mga naaaksidente na kina-imbweltuhan kan mga nasa impluwensya nin arak, mga menor de edad an nagmamaneho, asin mga warang sulot na helmet.
Sa presente, wala too nang mga checkpoints an saindang piggigibo nganing masawata an mga pasaway na mga motorista.
Pagirumdom ni Cha sa mga driver na permihang mag-ingat asin iwasan an marikas na pagmamaneho huli ta makakabaot man sana sa papadumanan maski mabantol sana an padalagan.
