LEGAZPI CITY- Padagos an esfuersos kan mga electric cooperatives sa provincia kan Catanduanes ngani na dagos na maibalik an suplay kan kuryente sa lugar makalihis an pangrarapado kan nakalihis na raot nin panahon.
Segun ki First Catanduanes Electric Cooperative public information officer Florence Lopez sa intrevista kan Bombo Radyo Legazpi na target an 100% na pag-energized antes an panahon kan kapaskuhan.
Sa presente napag-araman na igwa ng apat na mga banwaan an naibalik na an suplay kan kuryente alagad bako pa nasa 100%.
Basado sa datos kan ahensya sa 27 Barangay sa banwaan kan Bato, nasa sampulo na an na-energized mantang sa 38 barangay sa San Andres, anom na an naibalik an suplay kan kuryente.
Apat na barangay na man an na-energized sa banwaan kan San Miguel mantang nasa 31 baragay na an napailawan sa banwaan kan Virac.
Sa 350 na mga barangay sa nasabing island province nasa 51 barangay na an energized na katumbas nin nasa 16.19%.
