LEGAZPI CITY- Pagpapakusog sa gabos na provincia asin pagtataong oportunidad sa lambang saro tangarig dae masayang an mga buhay na naibuwis kan mga ninunong Pilipino sa paglaban sa independencia kan Pilipinas.
Ini an nagin sentro kan mensahe ni Legazpi City Mayor Noel Rosal katakod kan pakikisumaro sa bilog na nacion sa ika-119 na komemorasyon kan Philippine Independence Day.
Kun kaitong panahon giyera an kalaban kan mga Pilipino, segun ki Rosal na sa presente nakikipagbakbakan an mga ciudadano sa pang-aro aldaw na problema siring na sana kan pagtios, korapsyon asin iba pang isyu.
Aminado man ining bako pasil an pigmamawot alagad dakula suboot an pagtubod kaini na an ipigbubusol na federalismo kan administrasyon an llave sa progreso kan kada provincia.
Inengganyar pa kaini an mga tawo na makisumaro sa lakdang huli ta bako sana mga opisyal an piglalaoman kaini na mahiro kundi an gabos na nagmamakulog sa nacion.
