LEGAZPI CITY – Suportado kan grupo nin mga paraooma an propwestong lakdang kan Department of Agriculture na taasan an pigpapataw na traipa sa mga imported rice.
Parte kan plano iyo na itaas an presenteng 15% na taripa sa 25% para sa enot na tranche asin makalihis an tolong bulan posibleng itaas giraray sa 35%.
Alagad segun ki Federation of Free Farmers National president Leonardo Montemayor sa intrevista kan Bombo Radyo Legazpi na dapat mga Marso o Abril pa dapat ipina-otob na kan DA an saindang lakdang huli ta aloy nang nag-aagrangay an mga lokal na paraooma sa sobrang pagbagsak kan paroy.
Dae man sinda pabor sa standrad increase huli ta kadiit sana an 25% asin dae man kaini matatawan nin sulusyon an hababang presyo kan paroy mantang dae pa man kumpirmado kun nuarin maisasakatupadan an lakdang.
Mawot niya man na may mga ehekutibo na magtulak sa kongreso nganing mabago o ma-amyendahan an executive order number 62 huli ta dati na ining may problema alagad dae man ninda nasusulusyunan.
Pigtaram pa kaini na bako karaw-karaw an pagkalugi kan mga paraooma sa enterong nacion huli ta uminabot na ini sa P54 Billion mantang maabot sa P25 Billion man an nawara sa revenue kan taripa kan Bureau of Customs poon kan ipinaotob an EO-62.
Afuera kaini an suportado man ninda an joint resolution na isinunad ni Senator Kiko Pangilinan asin Senator Risa Hontiveros nganing i-terminate an kapangyarihan kan Ehekutibo na magbaba nin taripa sa imported rice nganing maisalbar an kabuhayan kan mga lokal na paraooma.
Kahagad ni Montemayor na dae na madugangan pa an kadifisilan kan mga paraooma huli sa mabantol na paghiro kan gobierno kun kaya dapat nang itaas an traipa kan imported rice urog nang madali na an panahon kan anihan.
